Կոմիտասեան Պատարագ - Komitasian Divine Liturgy
Խորհուրդ Խորին - Hymn of Vesting
|
|
Խորհուրդ խորին, անհաս, անսկիզբն, որ զարդարեցեր զվերին պետութիւնդ, ի յառագաստն անմատոյց լուսոյն, գերապանծ փառօք, զդասս հրեղինաց:
|
Խորհուրդ խորին, անհաս, անսկիզբն, որ զարդարեցեր զվերին պետութիւնդ, ի յառագաստն անմատոյց լուսոյն, գերապանծ փառօք, զդասս հրեղինաց: Անճառահրաշ զօրութեամբ ստեղծեր զԱդամ՝ պատկեր տիրական, եւ նազելի փառօք զգեստաւորեցեր ի դրախտն Ադենի, տեղի բերկրանաց: Չարչարանօք քո սուրբ Միածնիդ նորոգեցան արարածք ամենայն, եւ վերստին մարդն անմահացաւ, զարդարեալ ի զգեստ անկողոպտելի: Թագաւոր երկնաւոր, զԵկեղեցի քո անշարժ պահեա՛, եւ զերկրպագուս անուանդ քում պահեա՛ ի խաղաղութեան: |
Բարեխօսութեամբ - Hymn of Procession
|
|
Բարեխօսութեամբ Մօր քոյ եւ Կուսին՝ ընկա՛լ զաղաչանս քոց պաշտօնէից: Որ գերագոյն քան զերկինս պայծառացուցեր սուրբ զԵկեղեցի արեամբ քո, Քրիստոս. եւ ըստ երկնայնոցն կարգեցեր ի սմա զդասս առաքելոց եւ մարգարէից, սուրբ վարդապետաց: Այսօր ժողովեալ դասք քահանայից, սարկաւագաց, դպրաց եւ կղերիկոսաց, խունկ մատուցանեմք առաջի քո, Տէր, յօրինակ ըստ հնումն Զաքարիա: Ընկա՛լ առ ի մէնջ զխնկանուէր մաղթանս, որպէս զպատարագն Աբելի, զՆոյի եւ զԱբրահամու: Բարեխօսութեամբ վերին քո զօրաց՝ միշտ անշարժ պահեա՛ զԱթոռ Հայկազնեայց:
Յայս յարկ նուիրանաց - Hymn of Preparation
|
Յայս յարկ նուիրանաց ուխտի Տեառն տաճարիս. ժողովեալքս աստանօր ի խորհուրդ պաշտման պաղատանաց առաջիկայ սուրբ պատարագիս. խնկօք անուշիւք խումբ առեալ պարեմք ի վերնայարկ սրահս խորանիս. ուղղութեամբ ընկա'լ զաղօթս մեր որպէս բուրումն անուշահոտ խնկոց, տաշխից և կինամոնաց. և զմատուցողս պահեա' սրբութեամբ միշտ և հանապազ քեզ սպասաւորել: |
Մարմին Տէրունական - Body of the Lord
Մարմին Տէրունական եւ արիւն փրկչական կայ առաջի.
երկնային զօրութիւնք յաներեւոյթս երգեն եւ ասեն անհանգիստ բարբառով. Սուրբ, Սուրբ, Սուրբ, Տէր զօրութեանց: |
Քրիստոս ի մէջ մեր յայտնեցաւ - Christ is revealed
Քրիստոս ի մէջ մեր յայտնեցաւ, որ Էնն Աստուած աստ բազմեցաւ:
Խաղաղութեան ձայն հնչեցաւ, սուրբ ողջունիս հրաման տուաւ: Եկեղեցիս մի անձն եղաւ, համբոյրս յօդ լրման տուաւ: Թշնամութիւնն հեռացաւ, սէրն ընդհանուրս սփռեցաւ: Արդ պաշտօնեայք բարձեալ զձայն, տուք օրհնութիւն ի մի բերան, միասնական Աստուածութեանն որում սրովբէքն են սրբաբան. |
Սուրբ, Սուրբ - Holy, Holy, Holy
|
Սուրբ, Սուրբ, Սուրբ, Տէր զօրութեանց, լի են երկինք եւ երկիր փառօք քո. օրհնութիւն ի բարձունս: Օրհնեալ որ եկիր եւ գալոցդ ես անուամբ Տեառն. ովսաննա ի բարձունս: |
Որդի Աստուծոյ - Son of God
Որդի Աստուծոյ, որ պատարագեալ Հօր ի հաշտութիւն, հաց կենաց բաշխիս ի մեզ, հեղմամբ արեան քոյ սուրբ, աղաչեմք զքեզ, ողորմեա արեամբ քո փրկեալ հօտի:
|
Հոգի Աստուծոյ - Spirit of God
Հոգի Աստուծոյ, որ զփառակցի քո զխորհուրդ իջեալ ի յերկնից կատարես ի ձեռս մեր: Հեղմամբ արեան սորա, աղաչեմք զքեզ, հանգո զհոգիս մեր ննջեցելոցն:
|
Ամէն, Եւ Ընդ Հոգւոյդ - Amen, and with your spirit
Ամէն. Եւ ընդ հոգւոյդ քում.
Եւ եւս խաղաղութեան զՏէր աղաչեսցուք. Տէր ողորմեա. Ամենայն սրբովք, զորս յիշատակեցաք, եւս առաւելապէս զՏէր աղաչեսցուք. Տէր ողորմեա. Վասն մատուցեալ սուրբ եւ աստուծային պատարագիս, որ ի վերայ սրբոյ Սեղանոյս, զՏէր աղաչեսցուք. Տէր ողորմեա. Որպէս զի Տէր Աստուած մեր, որ ընկալաւ զսա ի սուրբ, յերկնային և յիմանալի Իւր մատուցարանն, զփոխանակն առաքեսցէ առ մեզ զշնորհս եւ զպարգեւս Հոգւոյն Սրբոյ, զՏէր աղաչեսցուք. Տէր ողորմեա. Ընկալ, կեցո եւ ողորմեա, եւ պահեա զմեզ, Տէր, Քոյին շնորհիւդ. Կեցո Տէր եւ ողորմեա. Զամենասրբուհի զԱստուածածինն, զմիշտ կոյսն Մարիամ, հանդերձ ամենայն սրբովք յիշելով զՏէր աղաչեսցուք. Յիշեա, Տէր, եւ ողորմեա, Տէր ողորմեա, Քեզ Տեառնդ յանձն եղիցուք, Տէր ողորմեա, Տէր ողորմեա, Տէր ողորմեա |
Հայր մեր - The Lord's Prayer
Հայր մեր, որ յերկինս ես,
սուրբ եղիցի անուն Քո, եկեսցէ արքայութիւն Քո, եղիցին կամք Քո որպէս յերկինս եւ յերկրի, զհաց մեր հանապազորդ տուր մեզ այսօր, Եւ մի' տանիր զմեզ ի փորձութիւն այլ փրկեա զմեզ ի չարէ. Զի Քո է արքայութիւն եւ զօրութիւն եւ փառք յաւիտեանս. ամէն: |
|
Ամէն. Հայր Սուրբ, Որդիդ Սուրբ, Հոգիդ Սուրբ. Օրհնութիւն Հօր եւ Որդւոյ եւ Սրբոյ Հոգւոյն այժմ եւ միշտ եւ յաւիտեանս յաւիտենից. ամէն |
Տէր Ողորմեա - Kyrie Eleison
Տէր, ողորմեա՛. Տէր, ողորմեա՛. Տէր, ողորմեա՛. Տէր, ողորմեա՛.
Արի Աստուած, հարցն մերոց, որ ապաւէնդ ես նեղելոց: Հաս օգնութիւն ծառայից քոց, լեր օգնական ազգիս Հայոց: |
Տէր, ողորմեա՛. Տէր, ողորմեա՛. Տէր, ողորմեա՛. Տէր, ողորմեա՛.
Ամենասուրբ Երրորդութիւն, տո՛ւր աշխարհիս խաղաղութիւն: Եւ հիւանդաց բժշկութիւն, ննջեցելոց արքայութիւն: Տէր, ողորմեա՛. Տէր, ողորմեա՛. Յիսուս Փրկիչ, մեզ ողորմեա՛: |
Տէր, ողորմեա՛. Տէր, ողորմեա՛. Տէր, ողորմեա՛. Տէր, ողորմեա՛.
Ամենասուրբ Երրորդութիւն, տո՛ւր աշխարհիս խաղաղութիւն: Եւ հիւանդաց բժշկութիւն, ննջեցելոց արքայութիւն: Տէր, ողորմեա՛. Տէր, ողորմեա՛. շնորհիւ աւուրն, մեզ ողորմեա՛: |
Տէր, ողորմեա՛. Տէր, ողորմեա՛. Տէր, ողորմեա՛. Տէր, ողորմեա՛.
Ամենասուրբ Երրորդութիւն, տո՛ւր աշխարհիս խաղաղութիւն: Եւ հիւանդաց բժշկութիւն, ննջեցելոց արքայութիւն: Տէր, ողորմեա՛. Տէր, ողորմեա՛. Յիսուս Փրկիչ, մեզ ողորմեա՛: |
Օրհնեալ է Աստուած - Blessed is God
Օրհնեալ է Աստուած:
Քրիստոս պատարագեալ բաշխի ի միջի մերում. Ալէլուիա: Զմարմին իւր տայ մեզ կերակուր. եւ սուրբ զարիւն իւր ցօղէ ի մեզ. Ալէլուիա: Մատի՛ք առ Տէր եւ առէ՛ք զլոյս. Ալէլուիա: Ճաշակեցէ՛ք եւ տեսէ՛ք զի քաղցր է Տէր. Ալէլուիա: Օրհնեցէ՛ք զՏէր յերկինս. Ալէլուիա: Օրհնեցէ՛ք զնա ի բարձունս. Ալէլուիա: Օրհնեցէ՛ք զնա, ամենայն հրեշտակք նորա. Ալէլուիա: Օրհնեցէ՛ք զնա, ամենայն զօրութիւնք նորա. Ալէլուիա: |
Գոհանամք - The Thanksgiving
Գոհանամք զքէն, Տէր, որ կերակրեցեր զմեզ յանմահական սեղանոյ քոյ: Բաշխելով զմարմինդ և զարիւնդ ի փրկութիւն աշխարհի. և կեանք անձանց մերոց:
|